المساعد الشخصي الرقمي

مشاهدة النسخة كاملة : الشرخ الشرجى,الأسباب,الأعراض,العلاج



زهرة الشرق
11-06-2005, 10:55 AM
السلام عليكم ورحمة الله وبركاته
اعزائى واخوانى واهلى اهل حارة الحب والخير والجمال حارة زعتر
اهلا بيكم
الحقيقة ان ما دعنى للكتابة فى هذا الموضوع او لنقل (اوحى الى) بالكتابة فية ,وانا غالبا ما يوحى الى شىء ما بالكتابة فى موضوع ما.
المهم ان ما دعانى هو الزيارة المفاجئة من جارتنا فى المنزل بعد المجاور لنا فى وقت اظنه متأخرا بالنسبة لمواعيد الزيارات ,فالساعة كانت قد تعدت الواحدة بعد منتصف الليل,وكنت قد عدت من المستشفى للمرة الأولى منذ ثمانية ايام ,منذ حوالى الساعة ,وكنت اغط فى نوم عميق ,حيث اننى مفتقدة لهذا الشعور اللذيذ منذ فترة طويلة نوعا ما ,شعور ان استلقى على فراشى فى منزلنا العامر ,وانام.
المهم اننى استيقظت على صوت امى الحبيبة تقول ,(قومى يا بنتى ,الحاجة (-----)عندنا وتعبانة جدا)
وخرجت من غرفتى بالروب فوق البيجامة والشعر الغجرى المجنون يسافر فى كل الدنيا,و قد رحت ابحث عن موقع عينى من وجهى لأضع فوقهما النظارة,واخيرا تم وضعها بحمد الله وتوفيقه,ونظرت امامى فوجدت الحاجة جارتنا واقفة وقد بدت على ملامحها معالم الألم والضيق وشعرت انها موشكة على البكاء,وقالت :معلش يا بنتى ,والله لولا شدة الألم انا ما كنت جيت ولا قلقتك فى وقت زى ده,انما انا بتألم من ساعات وفى النهاية ملقيتش قدامى حد غيرك,دانا حتى مجبتش حد من الولاد معايا علشان مضطركيش تغيرى هدومك يعنى وكده.
المهم علشان مطولش عليكم ,بعد الحديث والفحص واللذى منه تبين ان المسألة شرخ شرجى بدأـ الامة عقب نوبة امساك شديد اصيبت بها الحاجة,وازداد الألم وصحبه نزيف وصارت المسكينة لا تقدر حتى على الجلوس واصبحت كل الأوضاع بالنسبة لها مؤلمة
والشرخ الشرجى يا حضرات هو ببساطة عبارة عن قرحة طولية تحدث فى قناة الشرج او بمعنى ادق فى جلد قناة الشرج ,وتظهر كشق عند فتحة الشرج
**اسباب الشرخ:-
1-الحزق الشديد:-وعلى فكرة ليس بالضرورة يا اخوانى ان يكون الحزق بسبب الأمساك ,احينا يكون الأسهال ايضا سببا له,حيث انه فى احالات المصحوبة بالألتهاب بطانة المستقيم يعطى ذلك للمريض احساسا كاذبا بعدم اكتمال التفريغ ,فيحزق المريض بشدة محاولا اخراج ما يتوهم وجودة من براز فيحدث الشرخ
2-الجلوس لفترة طويلة:-مثلما يحدث للسائقين او مبرمجى الكمبيوتر او المعاقين حركيا,او اى شخص يجلس فى مكانه بلا حركة لفترة طويلة
3-الولادة:- من اكثر اسباب الشرخ شيوعا فى السيدات وهذا طبعا راجع الى الحزق اثناء المخاض والولادة فى محاولة الأم لدفع الجنين للخارج
**اعراض الشرخ:-
1- الألم:- اهم اعراض الشرخ ويكون غالبا اثناء التبرز وقد يكون شديدا يجعل بعض المرضى يصرخ او يبكى وقد يستمر لساعات بعد التبرز ,وفى عدد قليل من المرضى يكون الألم بسيطا وذلك يرجع من وجهة نظرى الى قوة تحمل المريض للألم وليس لأختلاف شدة الألم نفسة
2-تعسر التبرز:-يصفة المريض بتقلص او ضيق الشرج ,يعنى المريض يقولك(رغم ان البراز لين الا انى بحس ان الشرج مقفول مش بيخرجه)او يقولك (كأن الشرج مسدود)ويرجع هذا الى تقلص العضلة العاصرة الداخلية للشرج وهى عضلة لا ارادية,نتيجة وجود الشرخ المؤلم فى الشرج,وبعض المرضى يضطر للجلوس فى ماء دافىء عند كل تبرز لترتخى العضلة فتسمح للبراز بالخروج
3-الأمساك:-نتيجة خوف المريض من الألم يحاول تأجيل التبرز قدر استطاعته ,وقد وصل الأمر ببعض المرضى الى تأجيل التبرز اسبوع او اكثر ثم يأخذ ملين قوى فيتبرز بدون الم ,والبعض يلجأ الى ادخال انبوبة الماء فى الشرج لتفتيت البراز وتسهيل خروجه
اى ان الأمساك فى حالة الشرخ سببا ونتيجة فى نفس الوقت
4-النزف:-عادة يكون بسيطا نتيجة لشد حواف الشرخ ,وفى حالات قليلة يصبح النزيف عبارة عن (نافورة او بخاخ دم)اذا حدثت اصابة لشريان صغير قرب جلد الشرج
5- الحرقان :- يحدث حرقان بالشرج قد يستمر لفترة تطول او تقصر بعد التبرز
6-عدم الراحة:-لا يستطيع المريض ان يمارس حياته الطبيعية احيانا نتيجة استمرار الحرقان والضيق والألم
7:- الألتهاب الحاد:- ينتج عن تجمع كمية من الصديد تحت الشرخ ويصحبة الم مبرح وارتفاع فى درجة الحرارة وقد يلزم المريض الفراش,وقد ينفجر الخراج من تلقاء نفسة فيختفى الألم فجأة ,وقد يمتد الخراج ليكون ناصور شرجى
8-الأفرازات:- عادة ما تكون قليلة وتكون خليطا من المخاط والسوائل البرازية التى تتسرب على طول الشرج لتصل الى الخارج فتثير حكة شديدة لدى المريض واحيانا يتسبب له ذلك فى نوع من الحرج الأجتماعى يجعله يلزم دارة ولا يغادرة
**تشخيص الشرخ:-
التشخيص الأولى يكون بالفحص الشرجى,وهذا الجزء يهم الأخوة الأطباء اكثر من المرضى ,ولكن ولأنى (غلسة)زى مانتو عارفين ,فأنا بفرض عليكم المعلومات الطبية ,وناقص ادرسلكم طب بالمرة,لكن معلش استحملونى(ان الله مع الصابرين)وانا بنتكم برضة
الفحص الشرجى ايها الزميل فى الكفاح,يجب ان يتم بعناية وحرص على عدم ايلام المريض بقدر الأمكان(المسكين مش ناقصك انت كمان)
1-ابعد الأليتين عن بعضهما للكشف عن الشرج ,وعادة ستلاحظ وجود زائدة لحمية محمرة عند القطر الخلفى او الأمامى لفتحة الشرج
2-اضغط بالأصابع على حافتى الشرج لأبعادهما,عندئذ سيظهر الشرخ كشق صغير احمر اللون عارى من الجلد
او كقرحة صغيرة بيضاوية طولها حوالى 1 سم
3-عند محاولة ادخال الأصبع فى الشرج ستلاحظ مقاومة من المريض وقد تشعر بآهة مكتومة من المريض وقد يصل الأمر الى ان يصرخ المريض ويمنعك من الفحص ان كان من النوع الحساس للألم بشدة
4-اذا كنت طبيب شاطر وكان المريض متحملا الى حد ما واستطعت ادخال اصبعك فى فتحة الشرج ستلاحظ تقلص الشرج نتيجة توتر العضلة العاصرة زى ما قلتلك,وستحس بالشرخ كشق طولى عميق ان كان مزمنا وهنا يصل الألم الى اقصى درجاته
5-قد يكون هناك ضيق فعلىفى قناة الشرج وليس مجرد تقلص نتيجة التليف الناتج عن الألتهاب المزمن
6-التشخيص القطعى يكون عن طريق المنظار بعد تخدير المريض موضعيا
**ملحوظة هامة:-
لابد لكل طبيب عند مناظرة حالة شرخ شرجى ان يضع فى اعتبارة ان الشرخ قد يتشابه الى حد كبير جدا
مع سرطان الشرج ويجب ان يشك فى الشرخ خاصة اذا لم يكن على خط الأنتصاف الأمامى او الخلفى للشرج لأن الشرخ الفعلى يكون فى هذا الموضع,ولابد من التأكد بالفحص بالمنظار و اجراء عينة اذا تطلب الأمر
**علاج الشرخ:-
الام الشرخ الاما دورية,بمعنى ان المريض يحس بالألم فيلجأ للملينات وبعض المراهم المحتوية على مخدر موضعى,فيلتئم الشرخ جزئيا او كليا ويختفى الألم تماما ,ثم تأتى نوبة امساك او رحلة طويلة بسيارة او اتوبيس فيعود الحال الى ما كان عليه وهكذا
ولهذا فأنا شخصيا ارى ان علاج الشرخ المزمن لا يكون الا بالجراحة,وتشمل:-
1-استئصال الشرخ:- بقص الجلد المحيط بالشرخ لمسافة حاولى 2 او 3 ملليمتر مع استئصال الزائدة اللحمية التى قد تكون موجودة عند نهاية الشرخ الخارجية والتى ترى بمجرد النظر الى فتحة الشرج من الخارج
2-ارخاء العضلة الشرجية لمنع التقلص المسبب للأمساك والألم والحائل دون التئام الشرخ وقد يتم التوسيع بأحدى طريقتين
أ-توسيع فتحة الشرج بالشد بالأصابع تحت تخدير كامل للمريض
ب-قص جزئى للألياف النهائية للعضلة العاصرة الداخلية,وهو اجراء فعال جدا يخلص المريض من المة فورا
ولكن الزملاء من الجراحين الصغار يخافونه,لخوفهم من تجاوز الحد المطلوب ,ودائما اقول لهم ان خوفهم غير مبرر
طالما اجروا الجراحة بالدقة المطلوبة وفق الطريقة المتعارف عليها,وانهم ان ظلوا خائفين سيظلون عديمى الخبرة للأبد,انا شخصيا ارى ذلك (رغم انى مش جراحة)
ومن الجدير بالذكر انه يمكن اجراء العملية المزدوجة,التى هى استئصال الشرخ والقص الجزئى لألياف العضلة العاصرة تحت تخدير موضعى,ثم يعود المريض لدارة بعد الجراحة,اى ان المسألة بسيطة
وقد كنا نجريها اثناء القوافل الطبية احيانا.
**العناية بعد العملية:-
1-يحتفظ المريض بالشاشة فى الشرج لعدة ساعات ثم ينزعها بنفسه
2-يستأنف المريض تناول الطعام العادى بشرط الا يحتوى على فلفل او شطة وكذلك يستأنف الحركة الطبيعية
3-يعطى المريض مسكنا للألم وملينا خفيفا من نوع عشبى وقد يحتاج الى مرهم مخدر موضعى بالشرج وقد يحتاج الىبعض المضادات الحيوية
4-ابتداء من اليوم التالى للعملية يواظب المريض على الجلوس فى محلول مطهر ساخن(ماء ساخن مضاف اليه سافلون ويجلس فيه المريض لمدة ربع ساعة ما لا يقل عن اربع مرات يوميا)وبعد كل تبرز ولمدة حوالى اسبوع الى عشرة أيام,ثم يصبح المريض معافى بأذن الله.
وانا دائما اقول للمرضى ان علاج الشرخ الشرجى جراحيا هو الحل الوحيد لتفادى دورية الألم,والمثل الشعبى لدينا يقول(وجع ساعة ولا وجع كل ساعة)
والحقيقة اننا كمصريين لدينا ما يشبه الفوبيا من العمليات,مهما كانت بساطتها, فكلمة عملية تشعر المريض بأنه مقبل على تجربة حياة او موت حتى ان كانت مجرد فتح خراج
ويظل المريض يماطل ويتهرب ويؤجل,رغم ان ذلك يزيد الحالة تدهورا,وقد تصل الى مرحلة تصبح فيها حتى الجراحة بلا فائدة
يجب على المريض ان يثق فى طبيبه لأنه لا يريد الا مصلحته,وهذا طبعا على ان يكون الطبيب يتقى الله ومشهود له بالتدين والكفائة
ويجب ايضا على الطبيب الا يدلى برأى لا يثق فية او عنده مجرد شك فى صحته,فهو مسئول عن حياة انسان وليس عن اصلاح دراجة مثلا ,وهذا طبعا مع احترامى الشديد لجميع المهن الشريفة
وبالمناسبة انا ممن لا يميلون للعلاج بالمراسلة,يعنى لا اميل لأن اصف لمريض دواء بناء على اعراض كتبها لى او وصفها عبر الهاتف او عن طريق احد اصدقائة الذين يعرفوننى مثلا
لأن وصف المريض للأعراض يختلف من مريض لآخر,وقد يكون هناك عرض لا يلاحظه المريض ولا يكتشفه الا فحص الطبيب,هذا العرض قد يغير التشخيص تماما,فمثلا الحالة التى قد اشخصها من وصف المريض بشرخ شرجى قد اكتشف بعد الفحوص الدقيقة انها سرطان شرج ,وشتان بين هذا وذاك
وكذلك يجب على المريض ان يتوجه الى الطبيب فور شعورة بأعراض اى مرض,ولا يعتمد على(انا اخدت ده من سنتين وريحنى )او (صاحبى حس بنفس الأعراض وارتاح على الدوا ده فأجربه)لأن عشرات الأمراض قد تتشابه فى الأعراض,كما ان المرض الواحدقد تختلف اعراضة من مريض لآخر احيانا ,كما ان جسمك ليس حقلا للتجارب.
اصدقائى الأعزاء واهلى الكرام اهل حارة زعتر الغالية,انا عارفة انى طولت عليكم جدا جدا جدا :)
ان لولا معزتى عنكم كنتم ضربتونى ,لكن انا برضة عارفة انى مش هاهون عليكم,كمان انا عيانه اليومين دول والضرب فى العيان حرام
عموما والله انا لم اتعمد التطويل انما هى طبيعة الموضوع الذى حرصت بقدر الأماكن ان يكون مفيدا للجميع من اطباء ومرضى واصدقاء وجيران وكول كول الناس,واهو العلم حلو برضة
ويا رب يا رب اكون قدرت افيد ,لأنى لو قاعدة على الكيبورد وانا تعبانه ومرهقة ومش نايمة من امبارح الصبح
والحمد لله انى قدرت اخد ليلة الا تلت اقضيها فى البيت طار منها نص ساعة واكتر فى الكشف على
جارتنا العزيزة,لولا انى نمت الكام ساعة دول كنت انهرت
المهم لو بعد كوووووول ده وكمان مقدرتش افيدكم ,يبقى انا اعزل من الحارة احسن
عموما انا فى النهاية ادعو الله ان اكون قد استطعت ان افيدكم وان اضيف لمعلوماتكم جديدا
وادعو الله ان يديم الصحة والعافية على الجميع
فى النهاية ,وحتى لقاء اخر بأذن الله
استودع الله دينكم واماناتكم وخواتيم اعمالكم
اختكم فى الله
زهرة الشرق bye

اسطى زينهم الحلاق
11-06-2005, 02:18 PM
موضوع رهيب فعلا
د زهرة

مجهود كبير جدا

ومعلومات رائعه

::warda::

عبد الهادي
11-06-2005, 10:19 PM
جزاكم الله خيراص يا دكتورة ....ومن دعاء علي بن أبي طالب بعد الخروج من دورة المياه ( الخلاء ) :

الحمد لله الذي أذاقني لذته وأبقي في قوته وأذهب عني أذاه
أظنه رضي الله عنه كان يفقه ما يقول:clab:

garfield
11-06-2005, 11:40 PM
عند محاولة ادخال الأصبع فى الشرج ستلاحظ مقاومة من المريض وقد تشعر بآهة مكتومة من المريض وقد يصل الأمر الى ان يصرخ المريض ويمنعك من الفحص ان كان من النوع الحساس للألم بشدة

تعليق بسيط لو تسمحي يا زهرة ........في حدود معلوماتي البسيطه انه في حالات الشرج الحاد بيكون الفحص الشرجي p-R ممنوع contraindicated نظرا لللألم الشديد وان احنا بنعمله فقط في الحالات المزمنه



ارخاء العضلة الشرجية

فيه دلوقتى مرهم بيعمل على ارخاء العضله الشرجيه الماده الفعاله فيه glycerol trinitrate بس لأسف مش موجود في مصر :sad:

جزاكي الله خيرا يا دكتور على مجهوداتك الرائعه ومواضيعك المفيده جدا جدا #21

زهرة الشرق
11-07-2005, 09:37 AM
موضوع رهيب فعلا
د زهرة

مجهود كبير جدا

ومعلومات رائعه

::warda::
الف مليون شكر يا اسطى زينهم على متابعة حضرتك واهتمامك
يا رب اكون فعلا قدرت افيد واضيف جديد
تمنياتى لحضرتك بدوام الصحة والعافية ان شاء الله

زهرة الشرق
11-07-2005, 09:42 AM
جزاكم الله خيراص يا دكتورة ....ومن دعاء علي بن أبي طالب بعد الخروج من دورة المياه ( الخلاء ) :

الحمد لله الذي أذاقني لذته وأبقي في قوته وأذهب عني أذاه
أظنه رضي الله عنه كان يفقه ما يقول:clab:
وهل كان منهم من لايفقه ما يقول يا اخ عبد الهادى؟
رزقنا الله علمهم وايمانهم وتقواهم وحرصهم على كتاب الله وسنة رسوله,وجمعنا واياهم فى الجنة ان شاء الله
اتمنى ان اكون قد افدتك يا اخى
وفقنا الله واياكم لما يحب ويرضى
سعيدة جدا بمرورك واهتمامك يا اخى

زهرة الشرق
11-07-2005, 10:07 AM
تعليق بسيط لو تسمحي يا زهرة ........في حدود معلوماتي البسيطه انه في حالات الشرج الحاد بيكون الفحص الشرجي p-R ممنوع contraindicated نظرا لللألم الشديد وان احنا بنعمله فقط في الحالات المزمنه




فيه دلوقتى مرهم بيعمل على ارخاء العضله الشرجيه الماده الفعاله فيه glycerol trinitrate بس لأسف مش موجود في مصر :sad:

جزاكي الله خيرا يا دكتور على مجهوداتك الرائعه ومواضيعك المفيده جدا جدا #21
اولا انا اشكرك جدا جدا جدا يا حبيبتى على ردك واهتمامك وتعليقك كمان
بالنسبة للفحص الشرجى فى الحالات الحادة احنا بنجرية ان كان المريض يتحمله ,لأن تحمل الألم يختلف من مريض لآخر كما تعلمين
اما طبعا ان كان المريض غير متحملا للألم فهو هيمنعنى من الفحص لوحدة,يعنى فيه بعض المرضى بيصرخ بمجرد محاولة الفحص ,وطبعا فى الحالة دى مش بيجرى وبنعمل منظار تحت تخدير
وفيه بعض المرضى بيتحمل الألم بشكل كبير وبيكلمنى ويتجاوب معايا اثناء الفحص,ولو سألته (انت حاسس بألم؟) يقولك (يعنى )
وده كمان بيختلف من طبيب للتانى فى اسلوبة فى الفحص,يعنى انا ليا زميلة عزيزة مش بتقدر تعمل الفحص ده لأى مريض حتى فى الحالات المزمنةلأن اسلوبها عنيف شوية,انا ساعات اقولها من باب المناكفة(احنا نبنج المريض كلى علشان تفحصية بس,اما لو هاتعالجيه فلازم يكون فى غيبوبة ),رغم انى انا بعمله احيانا لحالات حادة وبيمر بسلام الحمد لله
يعنى ببساطة انا لو حسيت ان المريض هيتألم بشده فمش بحاول اعمل الفحص اصلا,انا مش هدفى ازيد الم المريض ,هو مش ناقص.
اما بخصوص معلومتك عن المرهم فهى صحيحة اشكرك على اضافتها
المريض فى المعتاد بيلجأ للماء الدافىء بالخبرة الشخصية ,بالفطرة يعنى ,هو طبعا لا يعرف حاجة عن العضلة دى ولادرس تشرح ولا فسيولوجى ولا حاجة خالص
انما هو لما بيتعب تلقائيا بيجرب الماء الدافىء وبيلاقى انه ريحة فبيستمر على كده
انا فعلا سعيدة سعادة لا توصف بمرورك يا دكتور واهتمامك و اضافات المثمرة وردك الجميل يا حبيبتى
وفقنا الله واياكم لما يحب ويرضى
وفقنا الله واياكم لما يحب ويرضى

اسطى زينهم الحلاق
11-07-2005, 11:29 AM
الف مليون شكر يا اسطى زينهم على متابعة حضرتك واهتمامك
يا رب اكون فعلا قدرت افيد واضيف جديد
تمنياتى لحضرتك بدوام الصحة والعافية ان شاء الله

فيها افادة كتير

لانى يعنى انا................
اه
على طول

المهم

انا فرحان المستوصف فيه دكتوره بتكتب كده
بحس فعلا ان الحاره فيها طب

زهرة الشرق
11-07-2005, 11:43 AM
فيها افادة كتير

لانى يعنى انا................
اه
على طول

المهم

انا فرحان المستوصف فيه دكتوره بتكتب كده
بحس فعلا ان الحاره فيها طب
متشكرة للمرة الألف مليون على زوق حضرتك يا اسطى زينهم
الحارة فعلا فيها طب
واطبائنا الحلوين مالينها والحمد لله مش انا لوحدى
عموما ربنا يوفقنا جميعا
ونقدر دايما نفيدك يا اسطى زينهم
والله انا مش عارفه اودى وشى من زقكم فين يا جماعه
انا فعلا
ذبت خجلا
ربنا يخليكم ليا يا رب

زهرة الشرق
02-23-2006, 12:17 PM
على فكرة يا جماعة

اى سؤال - استفسار-حاجة -محتاجة فى الموضوع
اى خدمة واحنا فى الخدمة
::warda:: ::warda:: ::warda::
::warda:: ::warda::
::warda::

الطائر المهاجر
06-09-2007, 11:31 PM
مساءالخير دكتوره
انا باعانى من فتره شرخ كنت باعتقد فى البدايه انه بواسير وكنت باخذ ادويه كنت بارتاح
ومن اسبوعين عملت تشخيص عند جراح افادنى بانه الى عندى شرخ ووصف لى مرهم نيو هيموران وكبسولات ديفيدووبعد اسبوع ما وجدت تحسن كبير ووصفوا لى مغطس دافئمع عشبة المره وجدت تحسن بسيط بعد 4 ايام
فارجو من حظرتك التعقيب على حالتى ولكى جزيل الشكر والعرفان

زهرة الشرق
06-10-2007, 11:00 PM
السلام عليكم ورحمة الله وبركاته
أخى الطير المهاجر
شفاك الله وعافاك
استمر على العلاج مع الحمامات الساخنة وليكن الحمام الساخن لفترة لا تقل عن ربع ساعة بمعدل اربعة أو خمس مرات يوميا ويتم وضع المرهم بعده و اتبع النصائح التالية :-
- تناول الكثير من الخضر والفاكهة فى غذائك والخبز الأسمر ومنتجات الألبان المتخمرة .
- اشرب الكثر من الماء خلال يومك وابتعد عن المنبهات والكولا .
- احرص على دخول دورة المياه بانتظام يوميا وفور شعورك بالرغبة فى التبرز.
- تجنب الجلوس لفترة طويلة ومارس قدرا من الرياضة اليومية.
- ان كنت من أصحاب الأمساك المزمن فتناول ملعقة من شراب اللاكتيلوز قبل دخول الفراش يوميا لمدة اسبوع ثم كل يومين لأسبوع اخر ثم أوقفه واحرص على النصائح السابقة لعلاج الأمساك.
- ان لم تصل الحالة الى التحسن الكامل خلال اسبوعين فلابد من استشارة الجراح فى اجراء الجراحة ,وهى بسيطة على اى حال.
شفاك الله وعافاك ومتعك بدوام الصحة والعافية اخى.
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

الحوراء
06-11-2007, 01:09 AM
ربنا يكرمك يا اغلى سمكة في الوجود
بجد بستبشر لما بشوف ليكي مشاركات

وكل ما بقرا مشاركاتك بقول لو زعتر بعد الشر يعني
طارت كل المواضيع اللي عليه
هنجيب مواضيع زهرة تاني ازاي ؟


تعرفي احلى جملة في الموضوع
ده بما اني مش ليا في الطب وكده


والشعر الغجرى المجنون يسافر فى كل الدنيا,

:ker: :ker: :ker:

الطائر المهاجر
06-11-2007, 04:46 PM
الف الف شكر لكى يادكتوره واتمنى انى ما احتاج الى جراحه

no0r
06-11-2007, 04:59 PM
ربنا يكرمك يا دكتورة زهرة

موضوع رائع جدا و مفيد جدا جدا

سلمتِ و طبتِ و دمتِ بخير

زهرة الشرق
06-11-2007, 07:52 PM
ربنا يكرمك يا اغلى سمكة في الوجود
واياكم يا قواقع يا حبيبتى:ker:

بجد بستبشر لما بشوف ليكي مشاركات
ربنا يكرمك يا رب,ويخلينى ليكى:ker:



وكل ما بقرا مشاركاتك بقول لو زعتر بعد الشر يعني
طارت كل المواضيع اللي عليه
هنجيب مواضيع زهرة تاني ازاي ؟
ولو طارت زهرة نفسها,هتجيبوا مناكفة تانى ازاااى؟؟؟
أزمة فعلا#15



تعرفي احلى جملة في الموضوع
ده بما اني مش ليا في الطب وكده
احلى جملة فى الموضوع!!
هو انتى عايزة تقولى ان الموضوع فيه جمل موش حلوة!!
لا لا لا لا لا
انى اجده ازعل جوى جوى جوى{01}




:ker: :ker: :ker:




احلى جملة عجبتك,للأسف طارت من زمان خلاص:sad:
يمكن علشان دى اللى عجبتك؟؟؟:rolleyes:
يعنى انتى السبب#20#
حوراء
لتلتقى سيوفنا حينما تشرق الشمس{01}
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

زهرة الشرق
06-11-2007, 07:55 PM
الف الف شكر لكى يادكتوره واتمنى انى ما احتاج الى جراحه
لا شكر على واجب يا اخى
وانا أيضا اتمنى ذلك
شفاك الله وعافاك
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

زهرة الشرق
06-11-2007, 07:57 PM
ربنا يكرمك يا دكتورة زهرة

موضوع رائع جدا و مفيد جدا جدا

سلمتِ و طبتِ و دمتِ بخير
أكرمنا الله واياكم اخت نور
الحمد لله الذى وفقنى للأفادة
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

someone
06-12-2007, 03:18 PM
اشكرك جدا علي المعلومات التي افادتني جدا
واحب ان استشيرك استشارة طبية وابقي قوليلي علي الفيزيتا وربنا يسهل عشان الحق احوشهالك
زوجي كان عنده شوية مشاكل بالجهاز الهضمي
اولها انه كان عنده ناصور وعمل العملية ومش كان ناصور بس كان فيه خراج وحاجات تانية كتير والكلام ده كان من سنتين و بعد كده اشتكي من القولون وكان بيتعالج لانه كل ما كان بياكل أي حاجة يجيله اسهال انا قلت وقتها ممكن من المية او الاكل لانه كان وقتها مسافر بلد عربي وقلت ممكن من تغيير المعيشة او عامل نفسي للغربة
ولما رجع بعد بضعة اشهر كانت مشكلته في الانتفاخ دائما وابدا في كل الاوقات لدرجة انه كان مش بيقدر يحافظ علي وضوئة بعد التسليم من الصلاة الا ثواني معدودة وكان ممكن يتوضأ للصلاة الواحدة اكتر من مرة بسبب الغازات
وحاليا مشكلتي معاه طبعا كل اللي فات مش كنت بعاني منه لاننا اتجوزنا من شهرين لكن دلوقتي
وآآآآآآآه من دلوقتي
بينزل منه من الدبر مادة غريبة اولا لونها مزيج من الاسود والاخضر القاني
بتلزق في الملابس الداخلية ولازم اغلي في كلور ومساحيق وبرضة مش بتنضف كفاية
المشكلة اني مش عارفة هي ايه
وبكون قرفانة جدا ومش عارفة اعمل ايه#20#
تفتكري افضل مسحوق ممكن استعمله ايه؟؟؟::rt:: ::rt::
أأأ….. اسفة قصدي علاج مشكلة زوجي ايه؟؟
المشكلة انه مش عايز يروح لدكتور للعلاج يقولي هروح اقوله ايه بينزل مني حاجات سوده وخضرا ومش مقتنع بالمعاناه اللي انا فيها
والمشكلة ممكن تتفاقم لكن هو مش مقتنع بدعوي عدم وجود مايقوله للدكتور
قولولي بالله عليكم ماذا تفعل لو كنت مكاني

زهرة الشرق
06-12-2007, 06:26 PM
السلام عليكم ورحمة الله وبركاته
اختى :)
افضل مسحوق مكن تستعمليه هو مسحوق شنكاح#21
نتيجته اكييييده,موش بس بيزيل البقع,لأ,بيزيل الهدوم نفسها:ker:
طول ما هتغسل بشنكااح,هدوومك هتدوب وترتاااح :ker: .
أما بالنسبة لزوجك,عافاه الله :)
فالعقل والمنطق بيقول انه طالما انه فيه افرازات من الشرج,يبقى مفروض اعرف مصدرها ايه,وبما ان الأفرازات دى مهياش براز,مفيهاش مادة برازية يعنى,يبقى الأقرب ان مصدرها الشرج نفسه,ومن وصفك للون الأفراز بأنه أخضر اللون أو اغضر غامق ,فده يدى انطباع انه افراز صديدى قد يكون مصحوب بنزيف.
وبما ان جوزك له سابقة أصابة بخراج فى الشرج,فوارد انه الخراج يحصله ارتجاع مرة تانية,ولو اتساب من غير علاج ممكن يسبب ناصور شرجى,وممكن يسبب مشاكل اخطر مفيش داعى لذكرها عشان مقلقكيش,ده لو كنتى يعنى لسه مقلقتييش B) .
الخلاصة ,ان جوزك لازما وحتما ولااااابد يشوفه دكتور,عشان يفحصه ويعرف سبب المشكلة جاى منين ويحله ان شاء الله.
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

someone
06-16-2007, 03:51 PM
اشكر لك استشارتيك
ولكني احب ان اعرف اين اجد شنكاح هل في السوبر ماركت بيتهيألي في هايبر او كارفور ممكن الاقية
وثانيا علي الاستشارة التي لم تفلح مع زوجي العنيد والذي لازال يماطل ويسوف
عموما لك الف شكر وجعله الله في ميزانك ان شاء الله
السلام عليكم

زهرة الشرق
07-02-2007, 10:08 PM
اشكر لك استشارتيك
ولكني احب ان اعرف اين اجد شنكاح هل في السوبر ماركت بيتهيألي في هايبر او كارفور ممكن الاقية
لاااا حبيبتى
ده التوكيل بتاعه عندى انا بس:ker:
وثانيا علي الاستشارة التي لم تفلح مع زوجي العنيد والذي لازال يماطل ويسوف
وماله
الزن على الودان اقوى من السحر
خليكى وراه
وللا اقولك
اغسليله بشنكاح وهو يوافق فورااااااااااااااااا::laaf::
عموما لك الف شكر وجعله الله في ميزانك ان شاء الله
السلام عليكم
لا شكر على واجب
وعليكم السلام ورحمة الله وبركاته
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

fuy79
09-07-2007, 05:51 PM
الاول كده

بسم الله الرحمن الرحيم

مش عارف ابدا منين يا دكتورة زهرة اهىء اهىء اهىء
انا اشتركت فى هذا المنتدى ودخلت حارة زعتر مخصوص عشان خاطر حضرتك وخصوصا
اناكنت بعمل بحث فى جوجل على موضوع الشرخ الشرجى ووجدت موضوك الرائع
انا يا دكتورة زهرة جالى شرخ شرجى
وروحت للدكتور عطانى علاجى والحمد لله خفيت
وبعد فترة جالى امساك مرة اخرى
لرجعت تعبت تانى ولكن هذه المرة الحالة تفاقمت
روحت المستشفى
الدكتور قالى عندك شرخ حاد وتجمع دموى
واصابنىالرعب الشديد بعد سماعى مصطلح تجمع دموى
انا الان عايش على الماء يا دكتورة
اصبح لى حتى كتابة هذه السطور اربعة ايام لم اكل شىء فقط عايش على الماء الماء الكثير

تحولت الى ما يشبه المومياء يا دكتورة زهرة

لا استطيع الجلوس او النوم وا اخشى ما اخشه ان اضطر الى دخول الحمام فا الموت اهون بالنسبة لى على دخول الحمام

وما زاد الطين بله هو هذا التجمع الدموى
وهو موجود على طرف فتحة الشرج وهو مؤلم نوعا ما ولا اعلم ما سا يشفى هذا التجمع

سوف اموت من الجوع على ان اكل واضطر ادخل الحمام فى ظل وجود هذا التجمع الدموى

ارجو ارشادى الى خطوات معينه
ابدا بها وادويه معينة ابدا بها

بحيث امشى على هذا العلاج خطوة خطوة لكى ييتم علاج الامساك باذن الله ومن ثم التجمع الدموى وبع ذلك الشرخ الشرجى
وارجو ذكر اسباب ظهور هذ التجمع الدموى

وارجو من سيادتك الاحساس بمدى المعاناة التى اشعر بها اثناء كتابة هذه السطور

جزاءكى الله كل خير يا دكتور زهرة الشرق

ربنا يخليكى لينا ولسكان حارة زعتر
يارب ترد يارب ترد
يارب ترد

بذمتك مصعبتش عليكى يا دكتورة
يارب تردى بسرعة

زهرة الشرق
09-09-2007, 10:34 PM
السلام عليكم ورحمة الله وبركاته
شفاك الله وعافاك اخى وأعتذر بشدة عن تأخر الرد,ففعلا لم أكن استطيع الرد قبل الآن:d2 .
التجمعات الدموية والصديدية والخراريج من المشكلات الشائعة جدا فى حالات الشرخ الشرجى والبواسير .
وما أود بداية ان الفت نظرك له انك بامتناعك عن الطعام تجنبا للألم المصاحب للتبرز تزيد المشكلة وتعقدها أكثر.
لأن امتناعك عن الطعام سيسبب امساك,وستضطر حتما للتبرز(ماهو حضرتك موش هتفضل ليوم الدين ممتنع عن التبرز:) )فيتسبب الأمساك فى زيادة الشرخ سوئا وقد تنفجر بعض الأوعية الدموية فتسبب نزفا حادا قد يكون قويا .11#
أعلم جيدا ان الألم شديد ,ولكن الأمتناع عن التبرز ليس حلا يا أخى:) .
وبالتالى فالخطوة الأولى للعلاج هى ان تأكل جيدا ,وأن تكثر جدا من الألياف فى طعامك (الخضر والفاكهة والردة ).
استعمل شراب اللاكتيلوز كملين بمعدل ملعقة كبيرة قبل الأكل ثلاث مرات يوميا ,لمدة ثلاثة ايام وتقلل الى مرتين يوميا لمدة ثلاثة ايام,ثم مرة واحدة يوميا مساء لمدة ثلاثة ايام ,ثم اوقفه تماما.
استعمل مرهم مخدر موضعى وليكن (لجنوكايين جل) مثلا,او اى مخدر موضعى ,فى فتحة الشرج قبل التبرز بخمس دقائق مثلا,وبهذا يتم تخدير الشرج فلا تشعر بالألم ان شاء الله (يجب استعمال مبسم شرجى لأدخال المرهم داخل فتحة الشرج ).
بعد التبرز احرص على الجلوس قليلا فى حمام ماء ساخن مضاف اليه بعض السافلون ,وبعده مباشرة جفف منطقة الشرج جيدا وضع مرهم مضاد للألتهاب متخصص مثل (بروكتو فور) ,يستعمل المرهم بمعدل اربعة مرات الى ست يوميا سواء تبرزت ام لا .
ان مر اسبوع ولم تتحسن الحالة بعد اتباع تلك الأرشادات لابد من الحل الجراحى بمعرفة الطبيب الجراح,وأرجو الا تحتاج له ان شاء الله.
تمنياتى لك بالشفاء العاجل اخى ولكل مرضى المسلمين ان شاء الله.
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

fuy79
09-11-2007, 12:17 PM
اولا يا دكتورة اقولك كل سنه وحضرتك طيبة
ثانيا بشكرك على مساعدتك للغلابة اللى زيى وربنا يخليكى للفقراء والمحتاجين وعابرى السبيل
وهنيئا لك يا فاعل الخير والصواب وحسنة قلي............ سورى نسيت نفسى يا دكتورة معلش

المهم يا دكتورة
انا بجد بشكر حضرت على مسا عدتى
بس انا لما روحت للدكتور كاتبلى على اربع ادوية الاول
كان ملين من نوع (بيكولاكس) (Picolax)

وهذا الملين له معى مشكلة وهى انه عندما اتناوله لاول مرة يعطى مفعول قوى
ولكن بعد ذلك لا يعطى اى مفعول على الاطلاق وكأن جسمى يتعود عليه فلا يعطى اى مفعول

ثم اعطانى مرهم من (لجنوكايين ) 5% (Lignocaine) وهو كما تعلمين مخدر موضعى وهو فعال وجيد

ثم كتب لى اقراص (فيلوسف سيفرادين 1جم) (Velosef) (cephradine 1gm) مرتين فى اليوم

ثم اقراص ديو سيد -سى 500مجم (Diosed-c) مرتين فى اليوم

ده كان العلاج اللى الدكتور كتبه لى يا دكتورة زهرة

وطبعا بفعل عوامل الطبيعة اضطرت اكل لاسف والحمدلله

وطبعا اضطرت ادخل الحمام
التبرز تم بصور ليست سيئة لم اعانى الما هذه المرة والحمد لله

المشكلة التى تؤرقنى هى التجمع الدموى حيث انها لم اعد اشعر منه باى الم ولكن فى نفس الوقت هى لم تشفى بعد
وان شاء الله انا حبتدىء امشى لى العلاج بتاع حضرتك بس لما يبقى معايا فلوس عشان فلوسى خلصت خلاص

واما بالنسبة لحمام الماء الدافى فا انا اواظب عليه والحمد لله
عندى بعض الاسلئة لكى يا دكتورة زهرة

السؤال الاول

عللى يعنى حزرى هل محلات الجزارة بتبيع لحمة

ايه اللى انا بقوله معلش يا دكتورة الجعان يحلم بسوق العيس

السؤال هو

ما رايك حضرتك فى وصفة الكتور وهل ان شاء الله ستساهم فى علاج التجمع الدموى ام
اذهب لعلاج حضرتك فورا

السؤال الثانى

على فكرة انا اسمى محمود

يعنى حضرتك لما تيجى تقوليى كل اكل غنى بالالياف هذا لا ينفع

حضرتك تقوليلى يا محمود تناول الاكل الفلانى ولا تتناول الاكل العلانى
رجاء اعطنا اسماء الطعام المفترض اكله واعطنا اسماء الطعام المفترض الابتعاد عنه


وكل عام وحضرتك بخير يادكتورة زهرة

محمود
الاسكندرية

زهرة الشرق
09-11-2007, 09:25 PM
السلام عليكم ورحمة الله وبركاته
بداية يا اخ محمود لا شكر على واجب:) .
ثانيا الحمد لله أشعر من كلامك بتحسن الحالة #5# .
ثالثا ,محلات الجزارة بالطبع لا تبيع اللحم,وانما تبيع المنتجات البلاستيكية ,بينما المختص ببيع اللحوم هو محلات الأدوات المنزليه.
أظن كده واضح!!:)
فيما يتعلق بالعلاج:) :-
مشكلتك مع الملين المذكور فعلية وتحدث مع معظم الملينات التى تعمل بميكانيكية عمل الملين المذكور,ففعلا القولون يتأقلم عليها تدريجيا فيحتاج المريض لزيادة الجرعة بصفة مستمرة ليحصل على الأثر المطلوب ,ولكن لا مشكلة بالنسبة لك حيث أنك مع تحسن الحالة لن تحتاج الى الملين أصلا ,فالهدف منه تقليل صلابة البراز بشكل يسمح بخروجه دون أن يسبب ألما أو احتكاكا بالشرخ بما يسمح بالتئامه .
لا تقلق فيما يخص التجمع الدموى فسوف يزول تلقائيا ان شاء الله مع تحسن الحالة واستعمالك للأدوية التى وصفها لك الطبيب.
ما أقصده بالألياف يا اخ ابراهيم الخضر والفاكهة الطازجة بكل أنواعها ,احرص على الأكثار من السلطة الخضراء فى طعامك بقدر المستطاع , فالألياف تساعد على ليونة البراز وتحفز حركة الأمعاء للأخراج بما لا يسمح بحدوث الأمساك ,وتناول الخبز الأسمر(أبو رده)وابتعد عن الخبز الأبيض لأنه يسبب الأمساك الذى يزيد من سؤ الحالة,كما يجب الأمتناع عن المأكولات الحريفة(الشطة)وكذلك المنبهات(الشاى والقهوة والكولا).
فيما عدا ذلك كل ما شئت من الطعام وأكثر من شرب السوائل ولو الماء فقط ,وتحرك جيدا فالحركة تساهم فى علاج الحالة,لا تجلس لفترة طويلة .
وأبلغنى بتحسن الحالة وأى استفسارت قد تخطر ببالك أخى.
كل عام انت بكل الخير .
::warda:: ::warda:: ::warda:: ::warda::
::warda:: ::warda:: ::warda::
::warda:: ::warda::
::warda::

ام برقع
09-02-2008, 09:43 PM
تعليق بسيط لو تسمحي يا زهرة ........في حدود معلوماتي البسيطه انه في حالات الشرج الحاد بيكون الفحص الشرجي p-R ممنوع contraindicated نظرا لللألم الشديد وان احنا بنعمله فقط في الحالات المزمنه




فيه دلوقتى مرهم بيعمل على ارخاء العضله الشرجيه الماده الفعاله فيه glycerol trinitrate بس لأسف مش موجود في مصر :sad:

جزاكي الله خيرا يا دكتور على مجهوداتك الرائعه ومواضيعك المفيده جدا جدا #21


طيب موجود فين المرهم ده يعنى ............ فى البلاد العربيه ولا الاجنبيه ... وهل يغنى عن العمليه ........... ضرورى تردوا الله يكرمكم ويعافيكم

ام برقع
09-02-2008, 09:47 PM
يا اختى زهرة الشرق عاوزه اكلمك ضرورى ى ى ى ى ى ى ى ى ى ى ى ى ى ى ى ى ى

المحتارة
01-21-2009, 06:35 PM
السلام عليكم ورحمه الله وبركاته
اختي زهره الشرق
اردت ان اسرد لكي معانتي يدئت منذ اربع سنوات هي اسهال شديد مع خروج مخاط وشخصت الحاله انها قولون تقرحي الكرون ووصف العلاج وهوه حبوب البنتاسيا ست حبات في اليوم من غير فائده فقررت ان ابعد عن التوتر والقلق النفسي وان اعيش حياتي بعيده عن الزعل وشيله الهموم من بالي بقدر مااستطيع فخفت الحاله لاكن السؤال المحيرني هو وجود كتل لحميه من بعد فتحت المهبل تقريبن ثلاثه سانتي او اثنين كتله كامله ثم بوجودلحميات متفرقه حول الشرج كل طبيب اذهب له يستبصط الحاله ويقول عادي وانا اقول كيف عادي في منطقه ضيقه ومحرجه وحساسه في نفس الوقت قررت ان اعمل عمليه اشيل فيها الكتلها التي من بعد فتحت المهبل لاكن دكتوره النساء رفضت قالت لما تتزوجي اعمليها ان ما اعرف مت يجي النصيب يمكن بعد عشر سنوات مثلا اقعد استناه علاشان اعمل العمليه المهم عملتها علا اساس اشيل كل شيء لاكن الجراح ماشالها شال فقط البعد المهبل وكتله صغيره من بعد الشرج شكله يتعلم فيني العمليه في مستشفى خاص باالرياض انا يدكتوره تعبت نفسيا من وجودها وشكلها المقزز لاكن الحمدلله الاخراج ونتي بكرامه كويس من غير الم والاسهال لايوجد مع العلم انها لاتؤلمني بس تعبانه من وجودها

المحتارة
01-25-2009, 11:00 AM
اختي زهره الشرق انتضر ردك

الحنجوري
07-09-2009, 01:55 AM
السلام عليكم ورحمة الله وبركاته

لقد قرأت هذا الموضوع الهام والمفيد بعناية حيث أعاني من هذا الألم وغدا ميعاد فحصي الثاني من قبل الطبيب المختص لكي يحدد لي ما اذا كنت أحتاج لتدخل جراحي أم لا... وقد استفدت كثيرا من خلال هذا الموضوع الملىء بالمعلومات الهامة.

وعليه..فقد أحببت أن أسجل كلمتين في هذا المنتى الرائع:
الكلمة الأولى: كلمة شكر وتقدير للدكتورة زهرة الشرق على هذا العرض الطبي الرائع والمتوج بجمال الكلمة وخفة الظل ممزوجا بتعزيز النفس للمريض وترسيخ الثقة بالنفس.... فلطبيبتنا كل الإحترام والتقدير وجزاها الله كل خير.. فنحن نفتخر بوجود هكذا أطباء في عالمنا العربي.

الكلمة الثانية: كلمة فخر واعتزاز أتقدم بها الى كل القائمين على هذا الصرح الرائع ..

حياكم الله .. مع تحياتي لكم جميعا
أخوكم / الحنجوري
فلسطين

الحنجوري
07-21-2009, 02:36 AM
أكتب مشاركتي الثانية بعد أن خضعت لعملية جراحية قبل ثلاثة أيام تقريبا .. وهي عملية الشرخ الشرجي .. وأحببت أن أكتب تجربتبي الشخصية حتى يستفيد من يعاني من هذه المشكلة.

في مشاركتي السابقة كنت قد ذكرت أنني ذاهب للطبيب حتى يقرر ما اذا كنت أحتاج لعملية أم لا... وفعلا قرر الطبيب ونصحني أن أعمل العملية حتى أرتاح بإذن الله من هذه المشكلة. وهنا أود أن أطمئن أي شخص مصاب بالشرخ الشرجي وأقول: والله ثم والله أنني لو كنت أعلم أن العملية ستكون بهذه البساطة لعملتها منذ زمن وارتحت... وأؤكد أن العملية بسيطة جدا جدا ولا يوجد بعدها أي ألم يذكر .. الألم بعد العملية طفيف جدا جدا جدا ...وقلت في نفسي " ياريت عملتها من زمااان وارتحت" .. ولا داعي للقلق ... المهم أن يكون الطبيب ماهر وذو كفاءة ... والان الحمد لله في ثالث يوم العملية بدأت أشعر بتحسن ملحوظ ...

هذه تجربتي البسيطة أحببت أن أنقلها اليكم .. داعيا المولى عز وجل أن يديم علينا جميعا الصحة والعتفية ... يا رب .

وأتوجه بالشكر الى الدكتورة زهرة الشرق مرة أخرى على موضوعها الرائع وتفانيها في العطاء.

مع تحياتي لكم جميعا .. ودمتم بود
أخوكم / الحنجوري
فلسطين